اخبار جهة مراكش | السبت 20 أكتوبر 2018 - 22:24
ملياردير ألماني يحي عيد ميلاده بمراكش وينفق مليار ونصف
امبراطور العقار الملياردير الالماني ايريك اوبرماير المعروف بعشقه لجمع سيارات الفيراري، جا دار عيد ميلادو ال66 في مراكش، وهاد عيد الميلاد حسب مصادر “كود”، كان باذخ بزاف، وجاب ليه 150 ضيف من كبار الضيوف منهوم مولات ماركة شواروفسكي والحارس السابق للمنتخب الالماني وبزاف دالشخصيات المهمة.
مصدر “كود”، لي كان حاضر فعيد الميلاد، أكد بأن الضيوف شدليهوم ففندق المامونية بينما هو خدا رياض غالي بزاف، مؤكدا بأن هاد الملياردير جاب معاه البيرة الالمانية، ولحوم الخنزير حقاش ماغايلقاوش هنا ديكشي لي بغاوه.
وزاد المصدر ذاته :” دوزو هنا ثلاثة أيام كانت باذخة، ودارو خيمة ملكية يدوزو فيها عيد الميلاد، والضيوف عجباتهوم مراكش بزاف، وكان البرنامج النهار الاول مشاو دارو مسابقة بيناتهوم ديال كارتينغ فسيركوي مولاي الحسن، والنهارالثاني دارو سهرة ف”بلدي كاونتري كلوب”، لي شدوها كاملة وزوقوها بديكور فيلم كازابلانكا حقاش ايريك كيحماق على ديك الفيلم، والنهار الثالث دارو خيمة فأغفاي”.
وأشارالمصدر إلى أن إيريك جاب معاه كولشي من ألمانيا حتى لي سيرڤور جابهوم معاه من ألمانيا، وكانت القيمة الاجمالية لي تخسرات على عيد الميلاد 1,3 مليون اورو في ثلاث ليالي حسب موقع كود.
